Hargeysa (Jam)- Madaxweynaha cusub ee Somaliland Md. Daahir Rayaale Kaahin, ayaa shalay guddoomiyey kulankii ugu horeeyey ee ay madaxtooyada ku yeeshaan golaha wasiirada cusubi.

Kulanka wasiiradu ku yeesheen hoolka shirarka golaha wasiirada oo madaxweyne Siilaanyo uu barbar fadhiyey madaxweyne-ku-xigeenkiisu, ayaa ahaa mid ujeedadiisu ahayd isbarasho iyo dardaaran la xidhiidha hawlaha qaranka horyaal.

Md. Axmed Maxamed Maxamuud (Siilanyo) oo hadal kooban u jeediyey wasiiradiisa cusub oo qaar ka mid ahi dalka dibada kaga maqan yihiin, waxa uu ugu baaqay inay xilka loo igmaday u gutaan si Hagar la’aan ah, isla markaana ku dedaalaan sidii ay caddaalad iyo sinnaan ugu dhiqi lahaayeen dadweynaha reer Somaliland ee horumarka u baahan.

Dhinaca kale, warsaxaafadeed shalay laga soo saaray xarunta madaxtooyada Somaliland, ayaa lagu sheegay in madaxweyne Siilaanyo digreeto ku magacaabay laba masuul oo madaxtooyada ka hawlgeli doona, kuwaasi oo kala ah Guddoomiyaha wargeyska Saxansaxo Cabdillaahi Maxamed Daahir (Cukuse) oo loo magacaabay afhayeenka madaxtooyada iyo Eng. Xirsi Xaaji Cali Xasan oo hore u ahaan jiray Guddoomiye-ku-xigeenkii Komishanka Doorashooyinka oo isna loo magacaabay inuu noqdo Chief Of Cabinet-ka madaxtooyada.

Printable version     Email this to a friend